لو بدي أترجم المصطلح حرفياً رح أحكيلك هو تسويق داخلي
لكنه متعارف أكتر بمصطلح التسويق بالافصاح او التسويق بالموافقة..
بس مش مهم شو معنى المصطلح بالعربي قد م هو مهم نعرف شو يعني هاد النوع من التسويق.
زمان كنا نكون قاعدين مع صحابنا فجأة يرن التلفون ويكون ع الخط شخص بده يسوقلنا منتج أو خدمة..
أو عم نشوف ايميلنا وفجأة نلاقي ايميل من شركة باعتالنا تسوقلنا لمنتجاتها او خدماتها..مع إنّا ما أعطيناها ايميلنا .
وكمان كنا نكون بنحضر برنامجنا المفضل ع التلفزيون وفجأة تيجي فقرة الإعلانات (متعارف عليها باسم دعايات) وتصير هالإعلانات تشتغل ورا بعض، كل شركة بتحاول تقنعك تشتري منتجهم أو خدمتهم..
هاد النوع من التسويق قائم على مقاطعة الناس interruption marketing أثناء قيامهم بإشي هم بيحبوه لحتى ينعرض عليهم الoffer اللي الشركة بتقدمه.. وهاي الطريقة تسمى بالoutbound marketing
وهي اللي كان معمول بها لعند م صار بالتلفون في خاصية كشف رقم المتصل وخاصية البلوك لرقم معيّن
بالإضافة لخاصية فلترة الايميلات من جيميل ونقل الايميلات الدعائية لملف الspam
الناس عموماً صاروا ما يلتفتوا لهيك أنواع من الإعلانات وصار عندهم زي مناعة ضدهم، وكمان بيشوفوهم مزعجة.
لو بدي أعطيكم مثال عن طريقة التسويق هذه بعالم الديجيتال، أقرب شيء هو الإعلانات ع السوشيال ميديا:
- بتقاطعك وانت بتحضر فيديو
- بتطلعلك وانت بتلعب جيم لعبة بتحبها ع الموبايل
- أثناء قراءة مقال مهتم فيه بتلاقي إعلانات الdisplay بكل الموقع
لكن، مع التطور التكنولوجي وتغيّر سلوك المستهلكين بالشراء، تطوّرت طرق التسويق
وصارت الشركات بدل م تروح لعند الناس لتروّج لمنتجاتها، تحاول تجذبهم بالتسويق اللي بنسميه inbound marketing
الفرق بسيط جداً
بدل م انت تكون بتحضر فيديو ومندمج وييجي إعلان يقاطعك وتستنى ع نار تطلع كبسة ال skip عشان تكمّل الفيديو،
صرت انت تكون بتدوّر وبتقرأ عن مشكلة بتواجهك وتلاقي معلومات قيّمة تفيدك
وتصير تقرأ مقالات أكتر عن الموضوع وكل م تتعمق بتلاقي حالك فتت مواقع بتحكي عن حل لهالمشكلة
لعند م توصل مكان تلاقي انه عارضلك منتج او خدمة لحل هالمشكلة، وبتلاقي حالك مقتنع أكتر بشراءه..
هون صار المستهلك هو اللي بإيده القوة وبيختار كيف ومن وين بده يشتري.
لو بدي ألخّص الفرق بجملة وحدة:
التسويق الـ outbound يبدأ من المنتج و كيف أسوقه و أبيعه لأكتر عدد من الناس.
بعكس التسويق الـ inbound اللي يبدأ من الزبون وبيشوف شو مشكلته وكيف بقدر أساعده
وهالشي صار ممكن بالتسويق بالمحتوى القائم على تلبية احتياجات الناس و كسب ثقتهم
وبالتالي بيصيروا متشجعين يشتروا من هالبزنس..
_______
الموضوع طويل وفيه أمثلة كتيرة، لكني حاولت قد م أقدر ألخّص الموضوع بهادا البوست.
وبتمنى أكون وصلت لهدفي والموضوع وضح بالنسبة الك..
تذكر انه التسويق لازم يواكب الناس والتطور التكنولوجي لحتى يعطيك نتائج مذهلة.

ومتل دايماً، بتمنالكم حضور رقمي فخم!

Back to Top