كم بتتوقع عدد الناس اللي عم تدوّر ع نفس الوظيفة اللي إنت بتدور عليها, بالعالم, بالمنطقة, أو حتى بمدينتك؟ المنافسة اشي طبيعي, وبرأيي اشي حيوي كمان. وانك تتميز عن منافسيك أو الناس اللي مهتمة بنفس فرصة العمل اشي مش صعب بهالعالم الرقمي.
رح أحكيلك 7 خطوات تساعدك تسوّق نفسك وتتميز برحلة البحث عن وظيفتك المناسبة واللي بتطمح توصلها:
1. فهم ميزتك التنافسية:
شو اللي بيميزك عن منافسيك لشغل هذه الوظيفة ممكن يكون دورة تدريبية بتميزك, أو تدريب بشركة عالمية, أو مزيج من خبراتك السابقة مع اهتماماتك الخاصة.
الهدف من التسويق الذاتي هو إنك توصل للوظيفة اللي بتطمحلها, ليعرفوك الناس, وتتميز
2. الاطلاع على آخر المستجدات بسوق العمل والمجال اللي بتشتغل فيه:
إلمامك بالمستجدات بمجال تخصصك (أو التخصص اللي مهتم فيه) بيعكس شغفك والتزامك, وممكن تضل متابع أول بأول عن طريق:
قراءة المقالات
قراءة بحوث ودراسات
متابعة المواقع الموثوقة
متابعة الخبراء والمؤثرين
متابعة مجالك وتجديد معلوماتك باستمرار, رح يساعدك بإنك تلاقي أجوبة ونقاط حوارية تساعدك تكون أفضل وأكثر ثقة بمقابلات الشغل المستقبلية.
3. تحديث العنوان الرئيسي الخاص بك (Headline):
العنوان الرئيسي هو أول شي بيشوفه خبير الموارد البشرية أو الأشخاص اللي عم يدوروا على كلمات مفتاحية معينة(رح أحكي أكتر عن الكلمات المفتاحية بنقطة رقم 5). لو كنت حالياً بلا وظيفة لا تكتب "عاطل عن العمل" أو أبحث عن وظيفة" في العنوان الرئيسي وتوقّف. بالعكس, هون بدك تضيف:
القيمة اللي حتضيفها للوظيفة كمرشَّح .
الكلمات المفتاحية اللي بتزيد من ظهور البروفايل الخاص بك.
بالإضافة لحالتك الآن وهية إنك عم تبحث عن عمل.
كمثال, ممكن لمدير تكنولوجيا المعلومات الباحث عن عمل استخدام "مدير تكنولوجيا المعلومات باحث عن تطوير التطبيقات أو البنية التحتية أو عن دور مدير الشبكات في الإنتاج أو التصنيع" كعنوان – هيك بتجذب كل من المستوى المهني والمهارات المطلوبة.
4. فعّل خاصية"متاح للتواصل بشأن الفرص المهنية الجديدة"
أول شي لازم تعمله حتى يلاقوك الناس المختصة بالتوظيف هو أنك تحكيلهم إنك متاح. LinkedIn بيعطيك فرصة تخصيص فرص العمل اللي تتوافق مع اللي بتدوّر عليه عن طريق:
إمكانية كتابة ملاحظة لجهات التوظيف
إمكانية تحديد المسميات الوظيفية
إمكانية تحديد المجالات اللي بتهمك تشتغل فيها
إمكانية تحديد المواقع الجغرافية
هالشي مو بس رح يساعدك إنك تجذب اهتمام الباحثين عن كفاءات, بل تجذب النوع المناسب من الفُرص.
5. تحسين ملف التعريف الخاص بك (استخدام الكلمات المفتاحية المناسبة)
الكلمات المفتاحية بتساعدك بالظهور في نتائج البحث, وكمان بتساعد مسؤول التوظيف يقرر إذا انت مناسب لفرصة العمل أو لأ. لتستخدم الكلمات المفتاحية بشكل فعال طبّق الخطوات التالية:
ادمج الكلمات المفتاحية بكل قسم من ملفك الشخصي.
على سبيل المثال، إذا كانت "إدارة المشاريع" إحدى مهاراتك وتطابق المؤهلات المطلوبة في الوظائف التي تبحث عنها ، فلازم تظهر عدة مرات في ملفك الشخصي.
عدّل أو ضيف على قسم المهارات ( LinkedIn بيسمحلك تضيف لحد 50 مهارة)
ضيف الكلمات المفتاحية لوصف وظيفتك
ضيف الكلمات المفتاحية للموجز (تحت نبذة عني)
لازم الكلمات المفتاحية تتطابق مع خبراتك ومع الخبرة المطلوبة في الفُرص اللي بتطمح تحصل عليها.
* لتعرف كيف تلاقي الكلمات المفتاحية المناسبة اقرأ النصيحة الاحترافية رقم 1.
6. إضافة صورة احترافية:
الصورة الاحترافية بتساعدك تقدّم نفسك كمحترف وبدون صورة ما رح تلفت انتباه الناس.
الناس ,بشكل عام, ما بيوثقوا بملف شخصي بدون وجه يربطوا الاسم فيه.
مواصفات الصورة الاحترافية:
تصوّر بملابس رسمية
خلفية الصورة نظيفة ومافيها كتير تفاصيل
الصورة من الكتف للوجه مش للجسم كامل
تجنب استخدام الفلاتر وصور السيلفي
ما تنسى تبتسم
7. بناء شبكة معارفك:
أخيراً وليس آخراً .. انضم للمجموعات المناسبة لمجالك وقدّم قيمة مهنية عن طريق:
نشر الأخبار المتعلقة بمجالك.
التواصل مع المستخدمين اللي بنشروا وظائف بتناسبك
طلب المشورة من أشخاص بمراكز متقدمة وكيف ممكن تحقق اللي هم حققوه بحياتهم المهنية (دائماً راعي آداب المراسلات ولا تكون لحوح بشكل مزعج)
الناس اللي بتعرفهم ممكن يساعدوك أكتر مما بتتخيل. وبهالعصر الرقمي, صار التواصل وبناء شبكة من المعارف أسهل من أي وقت مضى. LinkedIn هو مكانك الأمثل لتتعرف على الناس المناسبين.
نصائح احترافية:
1. إيجاد الكلمات المفتاحية المناسبة:
بحالة ما كنت متأكد من الكلمات المفتاحية المناسبة للوظيفة اللي بتطمحلها: شوف عدة وظائف شاغرة اللي بتهتم فيها. لاحظ أفضل خمس مهارات مشتركة بينهم وسجلهم بملفك الشخصي.
وممكن إذا بتحب تشترك بالنسخة المدفوعة من (LinkedIn Job Seeker) اللي بتظهرلك أفضل 10 مهارات بيدوّر عليها ناشر الشاغر مع تصنيف لكل وظيفة شاغرة.
على سبيل المثال, لنفترض أنك مصمم جرافيك وعندك خبرة في تصميم الشعارات (اللوجو), بس بدك تنتقل لتصميم الويب. بدل م تكتب "مصمم الجرافيك"، ممكن يكون عنوانك: "مصمم الجرافيك ذو الخبرة في العلامة التجارية للشركات ومتحمس لتصميم الويب".
2. تخصيص عنوان URL باسمك:
تخصيص عنوان URL باسمك بيسهل عليك تنشر ملفك الشخصي. بدل من العنوان التلقائي اللي عبارة عن أحرف وأرقام. لتخصيص عنوان URL اتبع الخطوات:
على شاشة "تعديل الملف الشخصي" بآخر الشاشة الرمادية اللي بتعرض معلوماتك الأساسية, حتلاقي عنوان الـ URL اللي لملفك.
اضغط على "تعديل" جنب URL.
حدد الـ URL اللي بدك إياه.
اضغط على تعيين/تحديد عنوان URL مخصص.